Guođoheaddjit manne Betlehemii, oaidnit mánáža mii lea riegádan. Mun lean álo atnán dán smávva dieđu diehttelassan, inge duođi eambbo dan guorahallan. Dál dat lea juoga maid mun mearkkašan. Go mii han eat leat daid maŋemus áiggiid sáhttán oaidnit nuppiid goas háliidit. Eat njuoratmánáid ge. Go dáid sániid čálán, de lea ain eahpesihkar movt juovlabasit šaddet. Dáppe min guovlluin davvin lassána njoammun. Sáhttit go čoagganit nu go háliidit, vuoi šaddat go mii njoammuneastadeami dihtii oktii vel basuhit juovllaid nu ahte mii eat čoaggan?
Mii varra ain dovdat sierranasvuođa dovddu maŋŋel go servvodaga giddejedje ja leat guhká doallan gaskkaid, ja ain lea eahpesihkar dagaha go njoammun ahte mii eat sáhte deaivvadit. De šaddá guođoheddjiid pilegrimmátki liige divrras ja čáppat. Seammás šaddá deháleabbon muitit ahte dat deháleamos lihkastat Betlehemas dan ija 2000 jagi áigi, ii lean guođoheddjiid vádjolus, dahje Maria ja Josefa mátki dahje eŋgeliid johtin, mo dal dat leaš geavvan. Danin go lei Ipmil ieš gii dagai dan deháleamos lihkastaga.
“Sátni šattai olmmožin ja ásai min gaski”
Ipmil bođii min lusa. Ipmil šattai oktan mis, ja lei gasku min olbmuid gaskkas. De eai lean olbmot geat fertejedje boahtit Ipmila lusa, muhto Ipmil gii bođii olbmuid lusa.
Ráddjejumiid ja hehttehusaid siste lea dát mas sáhttá vuoiŋŋadit. Go mii ávvudit juovllaid čiegusvuođa, ahte Ipmil šattai olmmožin, de ávvudit ahte mánáš kruppá siste čájeha midjiide Ipmila gii boahtá min lusa nu ahte ii hehttejuvvo min ráddjejumiin. Ipmila gii ohca min doppe gos mii leat. Ipmila gii ássá min gaski ja šaddá oktan mis.
Go mii čoagganit juovlaipmilbálvalusaide lea dat sihke buorre ja riekta. Lea buorre čoagganit ja máidnut aitto riegádan Ipmila ja lea riekta ipmilbálvalusas dan dahkat. Dát lea eambbo go buorre juovlavierru. Dat lea rohkadus ja giitevašvuohta. Muhto ii leat áibbas dárbbašlaš. Ledje juovllat diibmá maid, vaikko máŋgasii mis ii lean vejolaš čoagganit girkui.
Ipmil ii dárbbaš juovlaipmilbálvalusaid vuoi boahtá min lusa. Ipmil boahtá min lusa vaikko livččiimet okto. Ipmil boahtá min lusa vaikko leat olles bearrašiin ovttas. Ipmil boahtá min lusa jus leat čohkkáme dievva girkus gasku gili.
Danin sáhttit mannat vel oktii juovlabasiide main eahpesihkarvuohta váikkuha min, vissisvuođain dán ovttas: Ipmil lea gasku min gaskkas!
Mii doaivut ja rohkadallat juovlabasiid goas sáhttit friddjan vádjolit. Mii sávvat ja rohkadallat dievva girkuid juovlaipmilbálvalusain main mii ovttas ávvudit mánáža kruppás. Mii doaivut ja rohkadallat ahte mii sáhttit vádjolit nu go guođoheaddjit gittiin dahke. Mii doaivut ja rohkadallat ahte ii oktage dárbbaš leat okto juovllaid danin go ballá njoammumis. Mii doaivut ja rohkadallat ahte sáhttit čoagganit ja lávlut nu go eŋgelat gittiin: “Gudni lehkos Ipmilii allagasas, ja ráfi eatnama alde”. Mii doaivut ja rohkadallat juovllaid dakkáriin go mii leat hárjánan.
Go mii galgat ávvudit! Mii ávvudit dan searvevuođa maid Ipmil duddjui Betlehema ija. Searvevuođa mii čuvke buot rájiid ja ollá min lusa vaikko mii doallat gaskkaid. Go Ipmi bođii min lusa. Ipmil boahtá min lusa. Ipmil lea min luhtte.
“Sátni šattai olmmožin ja ásai min gaski, ja mii oinniimet su hearvásvuođa”
Mun sávan buohkaide buressivdniduvvon juovlabasiid.
Bisma Olav Øygard
Oversettelse:
Anne-Marit Eira Anti
Seniorkonsuleanta/ Girkodulka
Seniorkonsulent/ Kirketolk