Fadderansvaret handlar om å vise omsorg for barnet og bidra i barnet si trusopplæring. Det er foreldra til barnet som spør nokon om å vere fadder og det er ei tillitserklæring å bli spurt.
Fadrane skal vere vitne om at barnet er døypt med ein kristen dåp. Dei lover også å be for barnet og lære barnet å be. Dessutan skal fadrane hjelpe barnet til å bli kjende med bibelforteljingane og oppmuntre dei til å gå til nattverd.
Kvart barn som blir døypt, skal ha minst to fadrar. Fadrane må ha fylt 15 år og vere medlem av Den norske kyrkja, eller eit anna kyrkjesamfunn som ikkje forkastar barnedåp. Foreldre kan ikkje vere fadrar.
Minst to av fadrane må vere til stades ved dåpshandlinga, og alle fadrane blir ført inn i kyrkjeboka.
Å vere fadder fører ikkje til sivilrettsleg plikt, som til dømes å skulle overta omsorgsansvar for barnet viss foreldra døyr.