Med fokus på misjon
Komande veke er det misjon som er i fokus for mange av aktivitetane våre. Både konfirmantane og 10-åringane har misjon som tema, og 10-åringane skal endatil vere med å lage gevinstar til søndagen. Det er mykje vi kan snakke om når tema er misjon; urettferd, oppdrag, dele, nåde, varme, kulde, svolt, u-land, givarglede, reise, misjonærar, overtramp osv. Lista kan bli lang. Hovudfokus er at Jesus gav oppdraget til alle. GÅ og fortel. Døyp dei og lær dei. Det er nettopp det oppdraget vi ynskjer å ta på alvor. Av alt det andre Jesus sa og gjorde som vi kan lese om i Bibelen, ser vi at å dele av dei godene vi har med folk som lid nød også var i fokus.
Eit viktig samfunnsansvar
Gjennom misjonsorganisasjonar har kyrkja i Norge vore med å bygge opp samfunnet i mange land. I Hareid kyrkje har vi no særskilt fokus på barn og unge i Thailand. Vi har forplikta oss til å støtte dette arbeidet med min.kr.40.000,- kvar år. Det gjer vi med glans! Mange barn og unge har fått kle, mat og muligheit for utdanning av det vi samlar inn frå Hareid.
10-åringane, barnekantoriet og konfirmantane vert oppmoda om å pante flasker denne veka og kome med pantepengane i gudstenesta søndag. Då er det nemleg Barnas Misjonsdag i kyrkja. Barnekantoriet vil ta del med song og tonane til nokre av salmane kjem frå land det har vore misjonsarbeid i mange år.
Slik kan vi dele med kvarandre, og det er det misjon mest av alt handlar om: Etter Jesu oppdrag å vise omsorg for kvarandre.
Middag og misjon på bedehuset etter gudstenesta 18/11
Etter gudstenesta søndag inviterer vi til MIDDAG OG MISJON på Hareid bedehus. Det vert sal av brennsnut, kaffi og kaker. (10-åringane og barnekantoriet får gratis middag) Det vert også sal av årar, med mange fine gevinstar. Det er misjonsutvalet som er ansvarleg for dette arrangementet.
Laurdag 17/11 har misjonsforeningane i Hareid basar på bedehuset på ettermiddagen.
Misjonsavtalen Hareid sokn
Soknet samarbeidar med NMS der kyrkjelyden bidrar med å samle inn pengar og støtte prosjektet "Barn og utdanning" i Thailand. Hareid sokn har valt å forlenge denne avtalen med fire nye år, der vi har forplikta oss til å støtte dette arbeidet med minimum kr.40.000,- kvar år. Bli med å dele og å gi!