Torsdag 14. juni kl 20.00-21.30 - under «Opplev Hareid»
Bakgrunnen for tilstellinga er at det i næraste framtid skal kome ei informasjonstavle om historiske spor i kyrkja og på kyrkjegarden. Liknande tavler skal kome også på Kvitneset og Overåsanden.
I korte trekk vil arrangementet ha desse elementa:
Ei gruppe frå Bigset Blandakor kjem vandrande inn i kyrkja, syngande ein gregoriansk salme. Etter velkomstord frå soknepresten kjem hovudinnslaget, der arkeolog Arve Eiken held eit powerpoint- foredrag om middelalderen med hovudblikk mot dei spora som finst i og kring kyrkja. Foredraget blir delt opp i mindre bolkar der damekoret Siréne, med dirigent Torgeir Hauge, syng mellom bolkane. Under foredraget får vi også sjå Arnfinn Mork-Stordal sine teikningar av bl. a. den gamle stavkyrkja som stod her på 1200-talet.
Allsong
To gamle salmar blir fletta inn i opplegget som allsongar: «Folkefrelsar til oss kom» og «Deg å få skoda» - begge med godt over tusen år gamle røter.
Etterpå er det planen at folk skal få smake nylaga barkebrød – og deretter ber det ut på kyrkjegarden for å ta det som finst der i nærare augesyn.
Også startskot for Hareid kyrkjeakademi
Dette middelalderprosjektet vil også markere starten på eit kyrkjeakademi for vaksne i Hareid sokn. Kyrkjeakademiet skal vere eit tiltak som tek opp ulike tema kring tru, kultur og samfunn. Norsk kyrkjeakademi tilbyr medlemane økonomisk støtte og hjelp til å løfte fram tema. Tiltaket er økumenisk, d.v.s. at det er samlande for alle kristne kyrkjesamfunn.
Det kan bli ein både spennande og interessant kveld i Hareid kyrkje 14. juni. Sett gjerne av kvelden alt no.
Arrangementet er gratis.