Evy Volle Pettersen, har vakse opp i Ålesund, men med røter i Hareid kommune. Etter at ho fann kjærleiken på Hareid og flytta saman med Sverre Pettersen, har ho budd her. Hobbyklubben til Frivilligsentralen har vorte ein viktig del av livet til Evy og Sverre, noko som også er til glede for mange av dei andre som er innom. Då kyrkjekontoret kom med ideen om at vi kunne hatt ein dåpskjole til utlån var Evy den første vi tenkte på som kunne spørjast om hjelp. Og svaret kom momentant og med stor glede!
Gleda er absolutt på vår side og ikkje minst til dei som treng dåpskjole.
Mange har slike kjolar i familien og tidlegare hadde nokre butikkar også utleige av slike, men no kan det enkelt løysast dersom ein har behovet.
Tråd Kråa har sponsa tråden og den fantastisk flinke strikkedama, Evy Volle Pettersen, har på rekordtid strikka kjolen. Tusen hjarteleg takk!
Kjolen kan lånast frå kyrkjekontoret og må stellast etter behov, før den vert returnert.
Ingen alder for dåp, sjølv om denne dåpskjolen nok passar 0-3 mnd. best.
Fleirtalet av innbyggjarane i Hareid ber fram borna sine til dåp i løpet første halve leveår. Men det er fullt mulig å kome seinare, ungdom og vaksne kan også finne ut at dei ynskjer dåpen i livet sitt. I Hareid tilbyr vi trusopplæring 0-18 år gjennom 24 ulike tiltak årlig. Dette er ope for både døypte og udøypte, men berre dei døypte kan vi sende personlig invitasjon til sidan dåpen er inngangen til medlemskapet i den norske kyrkja.