Ein feltprest er ein prest som betener ei militær avdeling med kyrkjelege tenester, driv etikkundervisning og fungerer som rådgjevar for militære sjefar i moralske og etiske spørsmål. Feltprestane er ein del av Forsvarets trus- og livssynskorps (FTLK), og har ei viktig rolle i fredstid, ved øvingar og beredskap.
I Heimevernet er feltpresttenesta organisert slik at prestane til dagleg arbeidar i sivile stillingar, men blir kalla inn til teneste i samband med øvingar og hendingar gjennom året. Dette gir ei nær kopling mellom kyrkje og lokalsamfunn, samtidig som prestane bidreg inn i Forsvaret si verksemd.
Prestelaget Leif, Bjarte og Marte deltek i øvingar, seremoniar og markeringar i HV-09, og følgjer opp både soldatar og befal.
Feltprestane har også ei viktig rolle som samtalepartnarar. I møte med krevjande situasjonar, etiske dilemma og personlege utfordringar, tilbyr dei støtte og rettleiing. Tenesta er livssynsopen og tilgjengeleg for alle, uavhengig av tru eller bakgrunn.
Ved sidan av den militære tenesta har Leif, Bjarte og Marte sine daglege virke som sivile prestar. Leif Oma jobbar som sjukehusprest ved Haraldsplass diakonale sjukehus. Bjarte Nese er sokneprest i Bergen domkirke menighet. Marte Birkeland Åsen er fengselsprest i Bergen og Bjørgvin fengsel. Erfaringane frå både sivilt kyrkjeleg arbeid og feltpresttenesta utfyller kvarandre, og gir eit breitt grunnlag for møte med menneske i ulike livssituasjonar.
Har du spørsmål om feltpresttenesta kan du kontakta distriktsprest Leif på telefon 410 06 841 eller på e-post leif.oma@haraldsplass.no