Kvelden før Jesus vart krossfesta, var han saman med sine læresveinar. Dei åt eit godt måltid og snakka saman. Under dette måltidet starta Jesus tradisjonen med nattverd: Medan dei heldt måltid, tok Jesus eit brød, takka og braut det, gav det til læresveinane og sa: «Ta imot og et! Dette er min kropp.» Og han tok eit beger, takka, gav dei og sa: «Drikk alle av det! For dette er mitt blod, paktblodet, som blir utrent for mange så syndene blir tilgjevne. (Matt 26, 26-28)
I Ulstein sokn inneheld dei fleste av gudstenestene feiring av nattverd, og nattverdsmåltidet er sentralt i den kristne gudstenesta. Kvar gong vi feirar nattverd, blir desse orda frå Matteus 26 sagt! Kyrkja har teken på alvor dei lovnadane og den beskjeden Jesus gav. Difor har det å feire nattverd saman vore viktig for kristne gjennom to tusen år. Vi gjentek dei orda Jesus sa, og trur at når vi feirar nattverd saman, gjeld Jesu ord framleis. Difor er det ikkje berre brød og vin vi får i nattverden, men Jesu eige kropp og eige blod.
Alle er velkommen til å ta imot nattverd under gudsteneste i Den norske kyrkje. Nattverdselementa i Ulstein sokn er glutenfritt brød og alkoholfri vin.
Born er også velkomne til å komme og teke imot nattverd, men vi vil då anbefale føresette å ha snakka med sine born om nattverden i forkant.