Dette er den tredje konferansen i sitt slag, og den rettar seg mot kyrkjer og organisasjonar som er engasjerte i å møta menneske på flukt på ein god måte. På programmet står innlegg om bl.a.
- Fleirkulturelle utfordringar i nordiske kyrkjer
- Opplæring av frivillige
- Korleis gå frå "kvite" kyrkjer til fleirkulturelle kyrkjer
- Korleis byggje opp eit system liknande Welcome Churches?
- Det blir forteljingar frå ulike stader om det arbeidet dei held på med og det blir ein bolk med ulike seminar.
- Av omsyn til deltakarar frå bl.a. Finland og Island, er konferansespråket engelsk.
Kyrkjelydane i Alver er blant intiativtakarane til dei nordiske konferansane. Kyrkjeverje John Fredrik Wallace fortel at kyrkjelydane i Alver driv eit aktivt integreringsarbeid, no er det faste aktivitetar i fire av dei fem sokna. Noko av arbeidet starta for mange år sidan, mens anna er av nyare dato. – Vi har språk- og kulturkafear, arbeid på flyktningmottak og fellessamlingar mellom alle sokna, seier Wallace.
Støtte frå EU
– Vår store aktivitet rundt dette heng saman med vår deltaking i det europeiske programmet Erasmus+. Alver KF er som einste kyrkje i Noreg akkreditert Erasmus+ institusjon innanfor integrering og vaksne si læring. Gjennom såkalla jobb-skygging til kyrkjelydar i fleire land, og deltaking på internasjonale kurs/konferansar, har vi bygd opp eit nordisk nettverk av aktive kyrkjer og organisasjonar innanfor integrering, seier kyrkjeverja i Alver som håpar på mange deltakarar frå alle nordiske land på konferansen.
For informasjon og påmelding til konferansen, sjå lenke nedst på sida.