Ipmil! Mii rohkadallat ahte máilmmi álgoálbmogat adnošedje ovttaárvosaš lahttun du rupmašis. Divtte máilmmi oaivámuččaid ja máilmmi girkuid leat čuvgejuvvon, ja atte sidjiide návccaid rahčat álgoálbmogiid vuoigatvuođaid ovddas. Mii rohkadallat ahte don veahkehivččet kristtalaččaid miehtá máilmmi ovttas vuostálastit nállevealaheami, vaši ja veahkaválddálašvuođa.
Ipmil! Mii rohkadallat sámi álbmoga ovddas. Atte midjiide oktavuođa ja návccaid ja oro min luhtte. Vuostáiváldde min giitosa iežat attáldagaid ovddas, ja gula min rohkosiid go mii čuorvut dutnje, gula min šuohkkima go min jietna ii šat guotte. Mii rohkadallat ahte don doalašit várjaleaddji gieđat min álbmoga, min ealáhusaid ja min eatnamiid badjel. Divtte min eallit du eatnamiin guossin ja hálddašeaddjin, čohkkejeaddjin ja áittardeaddjin.
Ipmil! Mii rohkadallat sámegiela ovddas. Divtte sánát gullot buot váimmugielaide, ja atte min girkuide ja searvegottiide roahkkatvuođa váldit giela atnui. Mii rohkadallat ahte don láidet olbmuid girku bálvalussii, nu ahte mis álo leat báhpat, katekehtat, diakonat ja girkomusihkkačeahpit geat eai dušše hála sámegiela, muhto maiddái dovdet kultuvrra ja árbevieruid.
Ipmil! Čájet midjiide čielgasit maid ovddas mii beassat leat giitevaččat, ja divtte min máhttit illudit buot du oavdudaguin min árgabeaivvis. Divtte min oaidnit luonddu dakkárin go don leat midjiide dan addán, ja divtte min várjallit buot maid don leat sivdnidan. Mii rohkadallat ahte eat goassige vajáldahtáše mo min máddarat leat eallán das maid du eanan lea addán, ja ahte mii ain beasašeimmet joatkit dáid árbevieruiguin ja eallinvugiiguin. Oahpat min atnit árvvus guđet guimmiideamet, vai min osku dutnje kruvnniduvvošii ráfiin.
Ipmil! Mii rohkadallat ahte mii olmmožin oččošeimmet gierdavašvuođa daiguin geat eai ipmir, ráfi daiguin geat dagahit riiddu, ráhkisvuođa daidda geat vášuhit min ja ovddasmorraša daidda geat vaháguhttet min. Mii rohkadallat ahte don attášit midjiide roahkkatvuođa vuostálastit eahpevuoiggalašvuođa, ja návccaid diktit orrut gilvvekeahttá vaši ja giellásiid. Mii rohkadallat ahte don attášit midjiide jierpmi čoavdit riidduid bahávuođa ja veahkaválddi haga, ja čehppodaga dagahit gulahallama ja ráfi.