– Eg er glad og takknemleg for utnemninga til biskop i Bjørgvin. Det er ei stor oppgåve som eg går til med glede og audmjukheit.
Det seier den nye Bjørgvin-biskopen, Ragnhild Jepsen. Ho kjem frå stillinga som domprost i Nidaros bispedøme.
– Som biskop i Bjørgvin vil eg invitere breitt til å finne språk som opnar oss til frimodig å vitne om tru og trusuttrykk.
Kyrkjerådsleiar Kristin Gunleiksrud Raaum er nøgd med tilsetjinga:
– Det er historisk at Bjørgvin har fått sin første kvinne som biskop. Ragnhild Jepsen er ein framifrå liturg og erfaren leiar som vil vere med på å utvikle Bjørgvin bispedøme, seier Raaum.
– Jepsen er ein erfaren og samlande kyrkjeleiar med røynsle frå kulturliv og eit breitt samfunnsengasjement.
Den nye biskopen vert presentert i Bergen domkirke (Domkirkeplassen 1), fredag 10. februar kl. 11.00. Presentasjonen er open for alle som ynskjer å delta.
Du kan også følgje presentasjonen digitalt her.
På presentasjonen vil det vere innlegg frå kyrkjerådsleiar Kristin Gunleiksrud Raaum, preses Olav Fykse Tveit og bispedømerådsleiar Vemund Øiestad – og frå den nytilsette biskopen.
Jepsen vert vigsla til biskop i Bjørgvin søndag 16. april kl. 11.00 i Bergen domkirke, der H. M. Kongen deltek.
Det var tre kandidatar til biskop i Bjørgvin, etter den rådgjevande røystinga i haust:
- Sokneprest Kjersti Gautestad Norheim
- Domprost Ragnhild Jepsen
- Sokneprest Sunniva Gylver
Åtte av Kyrkjerådet sine medlemmer stemte på Jepsen som dermed er tilsett som biskop. Seks av medlemene ynskte Sunniva Gylver og to ynskte Kjersti Gautestad Norheim som biskop.
For presse
Presentasjonen i Bergen domkirke vert strøyma direkte på kyrkja.no og du kan sjå den her.
For pressa er det sett av tid til individuelle intervju. Meld frå til ak547@kyrkja.no om du deltek fysisk eller digitalt, og om du ynskjer intervju.