Stadig fleire kyrkjer har invitert til drop-in-dåp som ein del av pinsefeiringa. Ein helt enkel dåpsseremoni, samstundes som den er like stor og høgtideleg.
Ei av kyrkjene som opna for drop-in-dåp denne pinsehelga, var Slemmestad, der Marita Bjørke Ådland er sokneprest.
Gjennom dåpen får ho formidla Guds kjærleik og nåde: – Det finst ikkje noko større, finare og viktigare, meiner Bjørke Ådland.
Denne dagen vart åtte menneske døypt: små born, komande konfirmantar og vaksne frå heile Asker.
Det er stort og sterkt å få døype menneske, fortel soknepresten. Og det heile fekk denne søndagen skje i ei heilt enkel ramme. Ein treng ikkje melde seg på, ein treng ingen fest eller mange gjester. Ein treng berre eit ynskje om å verte døypt.
– Guds og Andens nærvær er heldigvis ikkje avhengig av verken dåpskjole, bunad, kake eller fest.
Glade for å ha blitt døypt
Far og dotter, Anders og Linnéa Eriksson, var to av dei åtte som vart døypt på drop-in i Slemmestad kirke denne pinsedagen.
– Vi er veldig glade for å ha blitt døypt, seier duoen.
Pappa Anders fortel om dagen: – Dåpen var i fine omgjevnader, og vi var veldig godt tatt imot av alle i kyrkja. Presten leste bibelord, og vi bad og song saman.
Deretter sjølve dåpshandlinga: prest Marita auste tre handfullar vatn over hovudet på dotter og far. Og så formulerte ho dei kjente og høgtidelege orda: – Eg døyper deg til namnet åt Faderen og Sonen og Den heilage ande.
Då var det gjort. Heilt enkelt, like stort.
Far og dotter var veldig nøgde med seremonien i Slemmestad kirke.
– Seremonien vart avslutta med vakker song til orgeltonar, fortel Anders Eriksson.
Et stort val å bli døypt som vaksen
Linneá og Anders er to av dei mange som har valt drop-in-dåp dei siste åra. Mange ungdommar og vaksne som har tenkt på dåp lenge har sett pris på den enkle seremoniforma.
– Det er eit stort val å ta å lata seg døypa som vaksen, difor vert det også så sterkt som prest å få vera ein del av den avgjerda, fortel sokneprest Marita Bjørke Ådland.
Ho utdjupar: – Det store underet skjer i dåpen, og det å møta blikket til alle som kjem for å verte døypt, det er det beste med prestejobben.