Beassášsáhka lea soabahus.
Soabahus lea áigeguovdilis sáhka servodagas dáid áiggiid. Ja vuolgga lea Duohtavuođa- ja seanadankommišuvnna evttohus mii diimmá giđa ilmmái. Sámediggi lea ságastallamin dás ja dán giđa maid Stuoradiggi ságastallá áššis.
Beassášsáhka gullá maid soabahussii. Lea sáhka olbmuin geat leat behtolaččat. Lea sáhka olmmošlaš bahávuođas. Lea sáhka Ipmila ráhkisvuođas. Dan ráhkisvuođas mii doalvu Jesusa jápmimii. Dát lea duođaid soabahus Ipmila ja olbmuid gaskkas. Jesusa bajásčuožžileapmi duođašta ahte soabahus lea ollašuvvan.
Soabahus lea Jesusa jápmima ja bajásčuožžileami bajilčála. Logudahkan ja ođđa álggu addin.
Muhto: Jus soabahus Ipmila ja olbmuid gaskkas galgá duddjot dagu min eallimis ja min oktavuođain, de dárbbašuvvo soabahus maid olbmuid gaskkas.
Go min riikkas lea kommišuvdna bargan soabahusain máŋga jagi, de dat soabahus gullá olbmuid gaskavuhtii, ja erenoamážit soabahus olmmošjoavkkuid ja eiseváldiid gaskkas. Muhto: jus mii galgat lihkostuvvat soabahusain, de ferte maid dáhpáhuvvat olbmuid gaskkas ja olmmošjoavkkuid gaskkas, ii dušše eiseváldiid ektui.
Jesusa ruossajápmin lea soabahus. Muhto: aivvestassii son okto dahká soabahusa. Olbmot besset vuostáiváldit dan maid Jesus addá – vaikko olbmot leat behtolaččat.
Go soabahus galgá dáhpáhuvvat olbmuid gaskkas, de dárbbašuvvo ahte mii dovddastit dan mii manai boastut ja gáhtat dan. Ja lea vel dárbbašlaš ahte mii geahččalit njulget dan mii manai boastut, vai vuoiggalašvuohta šattašii. Ja sávvamis šaddá de vuođđu addit ándagassii, vai lea vejolaš eallit buori searvevuođas ovddosguvlui.
Dál bargojuvvo soabahusain sámiid, kveanaid/dárusuopmelaččaid ja vuovdesuopmelaččaid hárrái. Dál lea áigi dovddastit ja njulget dan mii lea leamaš. Dat sáhttá šaddat buorren vuođđun soabahussii.
Mun duosttan jurddašit ahte kristtalaš girkus lea guovddáš doaibma váikkuhit soabahussii. Min kristtalaš oskku bokte leat mii veahá oahppan das mii soabahus lea. Mii diehtit ahte jus olbmuin galgá leat buorre searvevuohta, de eat sáhte guoddalemiid guottašit guhtet guimmiideamet ektui.
Dás ovddosguvlui go seanadanraporta lea almmuhuvvon, de lea dehálaš oažžut soabahusa gaskkal eiseváldiid ja unnitloguid, stuoraservodaga ja unnitloguid ja siskkáldasat unnitloguid gaskkas. Dat lea stuora ja váttis bargu. Muhto mis lea Jesus ieš ovdagovvan!
2.Kor 5 19 Ipmil ieš dagai soabahusa Kristusis ja soabahii máilmmi iežainis, iige son logahallan olbmuide sin rihkkumiid; midjiide son oskkildii dán soabahusa bálvalusdoaimma.
Olav Øygard
Davvi-Hålogalándda bisma