Det starta med smil, rørsle og song. Leif Ingvald Skaug veit korleis han skal få folk til å senke skuldrene og sleppe seg laus. Med humor, energi og smittande engasjement inviterte han deltakarane inn i eit musikalsk fellesskap der det ikkje var viktig å synge perfekt, men å vere med.
–Eg trur alle menneske kan synge. Vi må berre våge å bruke stemma slik ho er, er bodskapen hans.
Skaug har leia kor og allsang over heile landet i mange år. Han har sett kva som skjer når menneske samlast for å synge: Noko løyser seg opp, folk blir tryggare på kvarandre, og fellesskapet veks.
Å synge med hjartet utanpå kroppen
For Skaug handlar song om meir enn tonar og tekst. Særleg gospelmusikken har ein eigen måte å invitere heile mennesket med på.
–Gospel handlar om å synge med hjartet utanpå kroppen. Det skal vere levande, raudt og bankande!
Og nettopp det fekk deltakarane kjenne på. Her var det rom for å bruke heile kroppen, overdrive ansiktsuttrykka og lage både store og små lydar. Skaug viste korleis ein kan varme opp stemma med enkle øvingar, mellom anna ved å late som ein tygg og bruke den velkjende «mmmm»-lyden.
Han oppmoda også deltakarane til å røre på seg. Kroppen påverkar stemma, og når ein slepper seg litt laus, kan det skje noko med både klangen og songgleda.
Sjølv stod han ikkje akkurat stivbeint gjennom heile øvinga. Her var det lov å bevege seg, le og gjerne kalle det dansing.
Det må vere lov å dumme seg litt ut
Å synge saman krev at ein vågar å sleppe andre litt innpå seg. For nokre er det heilt naturleg å synge høgt og fritt. For andre kan det vere eit stort steg å opne munnen og sleppe stemma laus.
Difor er det viktig å skape tryggleik, understrekar Skaug. Deltakarane må få oppleve at dei kan prøve seg fram utan å vere redde for å gjere feil.
–Vi må våge å smile til kvarandre og gi kvarandre ein sjanse.
Med humor og små utfordringar fekk han folk med på leiken. Etter kvart voks både engasjementet og lydnivået. Songane vart lærte undervegs, og det var ikkje nødvendig at alle hadde øvd på førehand.
Det vart både allsong og kanon, mellom anna med songen «He's Got the Whole World in His Hands». Resultatet var eit herleg, syngande kaos der ulike stemmer fann saman i kyrkjerommet.
For å skape god korklang må ein faktisk tørre å gi gass. Det held ikkje å stå forsiktig og håpe at stemma ber. Ein må bruke henne!
Song som byggjer fellesskap
Peace Choir handlar om å samle menneske gjennom song, uavhengig av musikalsk erfaring. Ein treng ikkje vere korsongar eller kunne lese notar. Det viktigaste er å møte opp og vere villig til å prøve.
Når menneske syng saman, må dei lytte til kvarandre, finne rytmen og gi plass til dei andre. Slik blir songen også ei øving i fellesskap.
Kvelden var eit møte mellom menneske som kanskje ikkje kjende kvarandre frå før, men som fekk noko å dele gjennom musikken. Med smil, latter og song vart terskelen lågare for å ta kontakt og bli ein del av gruppa.
Peace Choir er eit initiativ frå LM Norge, som gjennom arrangementet også støttar arbeidet sitt for menneske i sårbare livssituasjonar. Deltakinga gir dermed både songglede og eit bidrag til eit viktig arbeid for andre.
Kanskje treng vi fleire slike møteplassar, der vi ikkje må prestere eller vere flinke, men berre kan møte opp som vi er. Der vi får bruke stemma, sjå kvarandre og oppdage at vi kan skape noko fint saman.
For fred og fellesskap kan byrje med noko så enkelt som at vi syng ein song saman.