Ráfigonagas
«Hávski lea eanan» mii lávlut juovllaid áigge. Mii lávlut ráfi ja ráfigonagasa ja hávkkis eatnama birra. Dan botta go mii ná lávlut, de seammá áiggi hearjida soahti Ukráinas - ja eará báikkiin. Hás mii leat dego guoktilaččat ja ollásii gáidan duohtadilis go lávlut na ja diehtit mo máilmmis lea dilli. Muhto mun čuoččuhan ahte dan mii eat leat. Aiddo dál mii galgatge lávlut dáid sálmmaid iluin ráfigonagasa dihte guhte riegádii.
Sálbmadahkki Bernhard Ingemann čálii sálmma Hávski lea eanan, ja son govvidii sániiguin nu hávskájin eatnama go lei suorganan ja hirpmástuvvan soađi dihte mii lei Danmárkku ja Schleswig-Holstein gaskkas jagiin birrasii 1850. Sálbma lea measta dego proteastasálbma mii muitala dan čábbodaga maid soahti lea bilidan. Mii sálmmas čuorvut eŋgeliid sániid Betlehema meahcis «Eatnamii ráfi», ja dan láhkái dat lea proteastačuorvvas soađi vuostá. Eanan sáhttá leat hávski, muhto mii bilidit dan go soahtat.
Ávvudehkot roahkkatvuođain ráfigonagasa dán jagi. Mánáš guhte riegádii ja su namma lea veagalaš Ipmil ja Ráfigonagas. Son gean birra daddjui ahte son lea boahtán ásahit ráfi mas ii leat loahppa ja dearpat mihkiid ja sáittiid plogaávjun ja viidnegárdeniibin. Jus mii goassege galggašeimmet muittuhit alcceseamet, de dat lea dán jagi, ahte Jesus bođii ráfiin, ráfigonagassan, ja «illun buot olbmuide».
Jesusa riegádeapmi mearkkaša ahte Ipmil šattai olmmožin. Son lea olmmoš dego mii. Juovlasáhka muitala maiddái dan láhkái ahte Ipmil ii guođe olbmuid, muhto son lea min luhtte, leaš mis dál buoredilli, dahje váttis eallindilli.
Dán jagi mii ávvudit juovllaid vuostevuođain soahtái ja lávlut vuostesálmmaid ja lohkat juovlaevangeliuma ráfisága, ja dat šaddá stuora proteasta- ja ráfilihkadussan.
Go mii basuhit juovlabasiid dán jagi, de mii leat mielde almmuheamen dan ráfi maid Jesus addá. Mii čuovvolit ráfigonagasa ja lávlut rohkadusain ja morrašis ja ilus:
Eatnamii ráfi
Olmmoš don illut
Agálaš Beasti riegádii
Sávan buriid juovlabasiid!
Olav Øygard
Bisma