Inger Gravem har vore tilsett i diakonstillinga i Lesja og Dovre sidan 2009. No har ho teke master i diakoni, og ynskja difor å verta vigsla. Gravem har mellom anna vore misjonær for Santalmisjonen i Nepal i til saman 7 år, der ho arbeidde 6 år på Den norske skulen i Katmandu.
- Diakoni er kyrkja si omsorgsteneste med fokus på skaparverket og mennesket som ein del av det. Diakoni er nestekjærleik i praksis, med fokus på mennesket sitt liv frå vugge til grav. Det handlar både om det som er førebyggjande og det som er helande, sa biskop Solveig Fiske i si vigslingstale. Ho avslutta tala slik: - Gå med tryggleik og tillit til Gud inn i tenesta som diakon. Eg vil påminna og dela med deg og kyrkjelyden ord frå evangeliet etter Johannes (14,1). Det er vakre og sterke Jesusord eg sender med deg: "Lat ikkje hjartet dykkar uroast! Tru på Gud og tru på meg." Så gå frimodig og trygg vidare i det viktige arbeidet som diakon i Lesja og Dovre.
På Kristi Himmelfartsdag har dei i Nord-Gudbransdal tradisjon for å samlast til prostistevne. Denne gongen vart stevnet lagt til Dombås. Prost Paul Skuland og prestane i prostiet var difor tilstades under den høgtidelige handlinga.