Rehabiliteringa er organisert som ei generalentreprise. Det vil seie at det vert inngått kontrakt med ein entreprenør som har ansvar for heile utføringa. Generalentreprenør skal med andre ord levere alle naudsynte fag for ei komplett utføring. Dette inneber mellom anna faga tømrar, taktekkar, malar, glas og vindauge, varme og ventilasjon.
Arbeidet omfattar mellom anna:
- riving og omlegging av tak og bere-konstruksjon
- utbetring av klimaskall og laftekasse
- rehabilitering og oppgradering av vindauge
- enøk-tiltak, til dømes isolering og nye varmekjelder
Når konkurransen er avslutta og entreprenør er tildelt, skal prosjektet opp til politisk behandling i Øygarden kommune. Prosjektet vert ikkje igangsett før kommunestyret har fatta vedtak om oppstart.
Planlagt oppstart for utføring av arbeidet er juni 2023. Arbeidet skal vere ferdigstilt i november 2024.
I perioden arbeidet pågår vil kyrkjerommet verte stengd for bruk. Kyrkjelydssalen vil verte open for bruk på ettermiddags- og kveldstid samt i helger, så langt det let seg gjere. I periodar vil også kyrkjelydssalen verte stengd.
Fjell kyrkje er listeført hos riksantikvaren, og er også den eldste av kyrkjene i kommunen. I kulturminneplanen til kommunen er Fjell kyrkje vurdert til å ha svært høg verneverdi. I tillegg til at kyrkja isolert sett er eit verna bygg, utgjer ho eit sentralt element i det historiske kulturmiljøet på Fjell gard, som har vore kyrkjestad og eit sentrum i soknet sidan 1300-talet. Bygningsvernet vil derfor vere sentralt i alle omsyn og samlege fag gjennom heile prosjektet.