Programmet starta med ein varm velkomst nede i Kyrkjestova, der alle vart presenterte, og vi song ein namnesong saman. Deretter gjekk vi opp til det store kyrkjerommet, der det var rigga til påskevandring. Saman følgde vi påskeforteljinga steg for steg.
Vi byrja med jula, der vi kikka på barnet i krubba og song «Eit barn er fødd i Betlehem». Neste dag i forteljinga var palmesøndag, og der fekk alle vifte med palmeblad og syngje «Hosianna». På skjærtorsdag fekk vi oppleve både fotvask og brødsbryting, noko som gav ei nær og fin ramme rundt forteljinga.
Vidare gjekk vi inn i langfredag, der vi samla oss rundt lysgloben og altaret, som symboliserte grava. Etter dette hadde vi ein stille sabbat, ein kviledag, der vi låg på mattene og tok det heilt med ro. Så kom påskemorgon, fylt med lys, glede og blomstrar, og vi song saman framfor den tomme grava.
Dei eldste ungane, som hadde lært seg å krabbe, fekk til slutt krabbe gjennom altaret for å «sjekke om grava var tom».
Etterpå samla vi oss til ein deilig påskelunsj i Kyrkjestova, der vi kunne vere saman og dele opplevinga vidare.