Etter gudstenesta vart det fotografering av kvart konfirmantkull. Dei eldste jubilantane var 95 år! Fire spreke damer som hadde 80-årsjubileum møtte fram denne dagen. Også 75-, 70-, 60- og 50-årsjubilantane stilte opp for fotografering før samlinga heldt fram i kyrkjelydssalen.
Der inne venta festpynta bord, og alle fekk servert middag med svinesteik og tilbehør. Sokneprest Per Hjemdal leia samlinga, og soknerådsleiar Eigil Nødtvedt kom med helsing og gratulasjonar til jubilantane.
Innimellom vart det song, og fleire av dei som var til stades delte helsingar, dikt og små og morosame forteljingar frå tida si som konfirmantar. Ei kunne fortelle om ein konfirmanttime 1955 som hadde gjort særleg inntrykk, då presten forklarte symbola i kyrkja – søylene, treenigheten og stjernene – og korleis syn og høyrsel kunne vere med på å formidle.
Etter middag vart det servert kaffi og kaker. Praten og latteren gjekk lett rundt borda, og mange delte gode minner frå konfirmasjonstida. Det vart ein hyggeleg og minnerik dag for jubilantane.
