Kva er Alpha?
Alpha er ein uformell møteplass der vi utforskar livet, trua og dei store spørsmåla saman.
Vi møtest rundt bordet, et saman, ser ein kort og engasjerande film om kveldens tema og snakkar om det vi har sett og høyrt.
Filmane tek utgangspunkt i den kristne trua, men samtalane er opne. Her er det rom for både tru og tvil, undring og skepsis. Du kan stille spørsmål, dele eigne tankar eller berre lytte til andre.
Du treng ikkje kunne noko om kristendommen på førehand. Du treng heller ikkje gå i kyrkja, vere religiøs eller ha bestemt deg for kva du trur.
Ingen spørsmål er for dumme. Og ingen forventar at du har svara.
Kva snakkar vi om?
Gjennom kurset utforskar vi nokre av dei store spørsmåla i livet. Kven var Jesus, og kvifor snakkar vi framleis om han to tusen år seinare? Kvifor be, og er det eigentleg nokon som lyttar? Kan vi stole på Bibelen? Og dersom Gud er god, kvifor finst det så mykje vondt i verda?
Vi snakkar òg om kva kristen tru kan bety i kvardagen, om Den heilage ande, om fellesskap og om korleis vi menneske kan finne meining og retning i livet.
Kanskje får du svar på noko du har lurt på lenge. Kanskje oppdagar du nye sider ved kristendommen. Eller kanskje går du heim med endå fleire spørsmål enn då du kom.
Det er òg heilt greitt!
Kven passar Alpha for?
Alpha er for alle vaksne som er nysgjerrige!
Kanskje er du søkjande og ønskjer å finne ut meir om kristendommen. Kanskje er du skeptisk til både Gud og kyrkja, men open for ein god samtale. Kanskje har du ei tru, men synest det er vanskeleg å setje ord på henne.
Kanskje har du døypt barnet ditt og har lyst til å vite meir om trua som dåpen handlar om. Eller kanskje er du konfirmantforelder og har fått spørsmål heime som du gjerne skulle visst litt meir om.
Alpha passar òg for deg som allereie er kristen, men ønskjer å utforske trua vidare.
Du kan kome åleine eller ta med ein ven, nabo, ektefelle eller kollega.
Heilt utan press!
Det fine med Alpha er at du kan kome akkurat som du er.
Du treng ikkje seie noko i samtalane dersom du ikkje vil. Du skal ikkje testast, vurderast eller overtalast. Det er ingen eksamen, og du treng ikkje førebu deg.
Og du bind deg ikkje til noko!
Du er velkomen til å vere med på alle samlingane, men det går heilt fint om du ikkje har høve til å delta kvar gong. Du kan òg kome den første kvelden berre for å sjå kva Alpha er, før du bestemmer deg for om du vil halde fram.
Det kostar ingenting å delta.
Har du lyst til å prøve?
Vi inviterer deg til hyggelege måndagskveldar med god mat, nye kjennskap, spennande filmar og samtalar om spørsmål vi kanskje ikkje tek oss tid til å snakke om så ofte.
Den første kvelden serverer vi middag. På dei andre samlingane blir det kveldsmat.
Oppstart: Måndag 18. januar 2027 kl. 18.00
Stad: Kyrkjelydshuset
Pris: Heilt gratis!
Av omsyn til maten set vi pris på om du melder deg på førehand. Men du treng ikkje bestemme deg lenge i førevegen. Du kan melde deg på heilt fram til kursstart – eller ganske enkelt møte opp!
Ta med deg nysgjerrigheita – og gjerne ein ven!
Du treng ikkje ha ei tru for å kome på Alpha.
Du treng berre vere nysgjerrig, skeptisk eller open!