Den kulturelle skulesekken (DKS) er ein nasjonal satsing som skal medverke til at elevar i skulen får eit profesjonelt kunst- og kulturtilbod. DKS skal legge til rette for at elevar i skulen skal få oppleve, gjere seg kjent med og utvikle forståing for kunst- og kulturuttrykk av alle slag.
Kyrkja har ei viktig rolle å spele i DKS. I Stortingsmelding nr. 8 (2007-2008) heiter det:
Religiøs tru har ein estetisk dimensjon som til alle tider har gjeve seg utslag gjennom kunst og kultur.
Den norske kyrkja forvaltar ein monaleg del av kulturarven vår gjennom dei om lag 1600 kyrkjene her i landet. Det rike kulturmaterialet som mange av kyrkjene inneheld, er kjelder til kunnskap, lokal identitet og oppleving. Livet i kyrkjene, musikken, liturgiane og tekstane kan òg vere kjelder til profesjonell formidling av kunst og kultur i Den kulturelle skulesekken.
DKS er eit viktig satsingsområde for Møre bispedøme, og vi har som mål at kyrkja skal vere ein viktig bidragsytar inn mot ordninga.
Lær meir om DKS i Møre og Romsdal: http://www.kultursekken.no/
Eksempel på lokale kyrkjelege DKS-produksjonar:
«I et speil, i en gåte…» Visuell kunst i kyrkjerommet. Produsert i 2015 av billedkunstnar Ine Harrang. Turnerer i fylket vår/haust 2016.
«Fortellingen om F» er eit teaterstykke skrive av Marit Kaldhol, med utgangspunkt i Håkon Bleken si utsmykking av Spjelkavik kyrkje. Framsyninga er produsert av Spjelkavik kyrkjelyd og inngår som ein del av Ålesund kommune sitt DKS-tilbod.
«Vinden er stille» turnerte i kyrkjer i bispedømmet i 2012, og blei sett av ca 6800 elevar på 8. – 10. klassetrinn. Framsyninga blei produsert av kulturavdelinga i Møre og Romsdal fylke i samarbeid med Kristiansund Kirke Kunst Kulturakademi.