Tema for T8-dagen er «Pilegrim», og bibelteksten er frå Lukas 24,13-35, om Emmausvandrarane. Vi vandrar saman langs «Den gamle kyrkjevegen» frå Morland til Fjell kyrkje, og undervegs gjer vi ulike undringsoppgåver. Stikkorda for dei ulike postane er «Korset», «Bøn», «Vatn», «Måltid», «Håp», «Påkastrøysa» og «Målet». Vi snakkar til dømes om kven vi trur at Jesus er, korleis og når vi kan be, kva vatnet kan brukast til i kyrkja (alt frå oppvask til dåp), om kva som skjer når vi et saman i kyrkja (både kyrkjekaffi og nattverd), og kva for håp vi går og ber på.
Åtteåringane hadde mange gode innspel på dei ulike postane, og det vart ein flott og lærerik dag for oss alle, både store og små. Framme i kyrkja var det hotdogservering, og det var veldig populært. Til slutt var vi samla i kyrkjerommet til ei stemningsfull pilegrimssamling der alle åtteåringane fekk kvart sitt kors i gåve.
