Dagens bibelord

Matteus 20,1–16

Dagens bibelord 30.08.2026

Matteus 20,1–16

¹  Almmiriika lea veardideames dáluisidin gii árrat iđedis vulggii bálkáhit bargiid viidnegárdásis. ²  Son soabai bargiiguin beaivebálkán ovtta denára ja vuolggahii sin viidnegárdái. ³  Goalmmát diimmus son vulggii fas olggos ja oinnii muhtumiid čuožžumin joavdelassan márkanšiljus. ⁴  Son dajai sidjiide: ‘Mannet diige mu viidnegárdái! Mun mávssán didjiide dan mii lea vuoigat.’ ⁵  Olbmát manne. Guđát ja ovccát diimmus son vulggii fas olggos ja dagai seammá láhkái. ⁶  Go son dasto oktanuppelogát diimmus manai olggos, de son oinnii velá muhtun joavdelasaid ja jearai sis: ‘Manne dii čuožžubehtet dás joavdelassan geažos beaivvi?’ ⁷  Sii vástidedje: ‘Ii oktage leat min bálkáhan.’ Son dajai sidjiide: ‘Mannet diige mu viidnegárdái.’
⁸  Go šattai eahket, de viidnegárddi eaiggát dajai dállodoallásis: ‘Rávkka bargiid ja atte sidjiide bálkká, maŋimuččaide vuos ja vuosttamuččaide easkka das maŋŋil.’ ⁹  Dat geat ledje bálkáhuvvon oktanuppelogát diimmus, bohte ja ožžo denára guhtege. ¹⁰  Go vuosttamuččat bohte, de sii gádde oažžut eambbo, muhto sii maid ožžo denára. ¹¹  Dalle sii nimmorišgohte ja dadje dáluisidii: ¹²  ‘Dát geat bohte maŋimužžan, leat bargan dušše ovtta diimmu, ja don leat addán sidjiide seammá bálkká go midjiide geat leat gillán beaivvi noađi ja báhka.’ ¹³  Muhto dáluisit celkkii muhtumii sis: ‘Ustiban, in mun daga dutnje veriid. Almma moai soabaime bálkán ovtta denára? ¹⁴  Váldde dan mii lea du, ja mana. Mun dáhtun addit maŋimužžiige seammá mađe go dutnje, ¹⁵  ja gal suige mun oaččun dahkat iežan opmodagain maid dáhtun? Vai anátgo don bahán dan ahte mun lean buorre?’ ¹⁶  Nu maŋimuččat šaddet vuosttamužžan ja vuosttamuččat maŋimužžan.”

Kilde: www.bibel.no