Dagens bibelord

Apostaliid dagut 3,1–11

Dagens bibelord 03.11.2026

Apostaliid dagut 3,1–11

¹  Peter ja Johannes manaiga tempelii. Lei rohkosbottu áigi, ovccát diibmu. ²  Dalle dohko guddojuvvui olmmái gii lei leamaš lámis riegádeami rájes. Son biddjojuvvui juohke beaivvi nu gohčoduvvon Čáppapoartta gurrii, vai son beassá gearjidit attáldagaid dain geat mannet tempelii. ³  Go olmmái oinnii Petera ja Johannesa mannamin tempelii, de son ánuhii sudnos attáldaga. ⁴  Peter geahčastii sutnje, nu maiddái Johannes, ja Peter celkkii: “Geahča munnuide!” ⁵  Olmmái geahčai sudnuide, go son doaivvui oažžut sudnos juoidá. ⁶  Muhto Peter celkkii: “Silbbat ja gollit mus eai leat, muhto mii mus lea, dan mun attán dutnje. Jesus Kristusa, nasaretlačča, nammii: Čuožžil ja vácce!” ⁷  Son dohppii olbmá olgeš gihtii ja čuoččáldahtii su, ja dan seammás olbmá juolggit ja láhpelađđasat nanosmuvve. ⁸  Son njuikii čuoččat, čuoččui ja váccii, ja son bođii sudno mielde tempelii, váccašii, njuikestalai ja máinnui Ipmila. ⁹  Buohkat oidne su go son váccii ja máinnui Ipmila. ¹⁰  Sii dovde su danin olmmájin gii lávii čohkkát ja gearjidit Čáppapoartta guoras, ja sii hirpmástuvve ja ovddošedje dan mii sutnje lei dáhpáhuvvan.
¹¹  Olmmái bisui ain Petera ja Johannesa luhtte, ja buot olbmot vihke ovddošemiin sin lusa dan báikái mii gohčoduvvo Salomo bázzehállan.

Kilde: www.bibel.no