Dagens bibelord

Matteus 22,1–10

Dagens bibelord 09.06.2026

Matteus 22,1–10

¹  Jesus sártnui ain veardádusaiguin ja celkkii sidjiide: ²  “Almmiriika lea veardideames gonagassan gii lágidii heajaid bárdnásis. ³  Son vuolggahii bálvaleddjiidis bovdet headjagussiid, muhto bovdejuvvon olbmot eai dáhtton boahtit. ⁴  De son vuolggahii eará bálvaleddjiid ja gohčui sin cealkit bovdejuvvon gussiide: ‘Mun lean lágidan headjamállásiid, vuovssát ja buoiddes gálbbit leat njuvvojuvvon, ja buot lea gárvvis. Bohtet heajaide!’ ⁵  Muhtumat bovdejuvvon gussiin eai beroštan das ja manne eret, muhtun beldosis ja muhtun gávpásis. ⁶  Earrásatgis dohppejedje su bálvaleddjiid, illastedje sin ja časke sin jámas. ⁷  Dalle gonagas moaráhuvai. Son vuolggahii soahteveagas, gottii sorbmejeddjiid ja buolláhii sin gávpoga. ⁸  De gonagas dajai bálvaleddjiidasas: Buot lea gárvvis heajaid várás, muhto bovdejuvvon olbmot eai lean dohkálaččat daidda. ⁹  Mannet dál luottaide ja luoddaearuide ja bovdejehket heajaide buohkaid geaid deaivabehtet. ¹⁰  Bálvaleaddjit manne ja čohkkejedje buohkaid geaid deive, sihke baháid ja buriid, nu ahte guossit ledje headjalanja dievva.

Kilde: www.bibel.no