Dánna såbadibme álggá.
Gå Jubmel mijájt návti, mijá dásen iejvvi, de såbadahttá. Ij midjij hervasvuodajn jali fámujn boade, ájnat lahkavuodajn. Sujna ælla gájbbádusá majt ep buvte ållidit, ájnat ármmo. Máná tjadá kruppon vellahime midjij tjiegosvuodav giehttu: Jubmel låjdås vuolus mijájt låpptijit. Mijá duohtavuohtaj boahtá váj mij sjaddap oassen suv duohtavuodas. Midjij mijá værálda ja dåssjåniddje ævtoj milta boahtá váj galggap såbadaláduvvat.
Såbadibme l duollit dav mij la boarkkiduvvam. Rievtesferdugahtesvuodajt ja gællásijt ierit biedjat boahtteájggáj - Jubmela ja almatja gaskan ja ulmutjij gaskanisá. Såbadibme dan gaskan mav lip, ja dan masi lip sjivnnjeduvvam liehket.
Álggá mánájn – mánná guhti alme ráfev guottat ietjas sinna ja fáron.
Almmelasj fuovva ráfe birra lávllu. Ij makkirak dåssjedis ráfe birra guoros loahpádusáj ja politihkalasj spelajn, ij dakkir ráfe massta ber sjaddi ájn vil ienebut gierddat sij gudi gierddi, ájnat ráfe mij vájmmuj manná. Ráfe mij boahtá dassta gå Jubmel vuostasj lávkev la lávkkim. Mijájt la duosstum. Ja dan duosstomin gávnnu såbadime vejulasjvuohta – ådå doajvvuj, ådå aktisasjvuohtaj ja ådå iellemij.
Javllaevangeliumin mujttádahteduvvap Jubmel ij vuorde dallutjij gå mij lip ållu buoremusá, åvddål boahtá. Boahtá jur gå lip vádnása, mijá kaosa gassko, jur gå lip håjen ja vuollánam – ja boahtá ráfijn.
Duosstut danen mánáv kruppon – ij dåssju dålusj hávsskes subttsasin ja javlladáhpen, ájnat ådå álggon. Jus Jubmel buktá buorrevuodav mijá lunna vuojnnet gå ep dav ánssida, gåktu de mij ep galga buktet sæmmi láhkáj ármmálasstet sijájt gejt iejvvip?
Tjuovggijus såbadime basseájgge midjij ådå gæjnov. Gæjnno gånnå Jubmel ja almatja bessi aktan váttsatjit. Gæjnno gånnå divna ulmutja bessi aktan váttsatjit. Gæjnno gånnå bæssá såbadit. Gæjnno gånnå ráfe l vejulasj. Gæjnno doajvvuj.
Den mørke stall skal være mitt hjertes frydeslott, der kan jeg daglig lære å glemme verdens spott. Der kan med takk jeg finne hvori min ros består, når Jesu krybbes minne meg rett til hjerte går.
«Mitt hjerte alltid vanker»
Tekst: H A Brorson
Na, sjievnnjis stállan mánásj dal tjierut krupputjin, ja gájkka baháv gierdasj de dáppe væráldin. De tjielggiduvvá vájmmuj muv ávvo gånnå le. Ja dalloj badján mujttuj muv gieres danna le.
«Muv vájmmo álu uhtjat»
Tæksta: H A Brorson
Sávav tjuovgav ja doajvov sjievnnjis ájggáj, ja buorissjivnnjeduvvam javlajt!
Svein Valle, Oarjje-Hålogalátte biskoahppa