Riksantikvaren har løyvd ein sum på inntil 906.000 kroner, slik at ekspertar frå Norsk Institutt for Kulturminneforskning (NIKU) over ein periode får utført konserveringsarbeid på mellomalder-altartavla. Instituttet vil presentere framgangen i prosjektet i sosiale media og på nett under #altertavleninorddal
Altartavla er ei såkalla ”Kalvari-gruppe”. Den har likskapstrekk med altartavler frå meisteren Bernt Notke og hans elevar i Lübeck, og ekspertane trur at altartavla skriv seg frå Tyskland omkring 1510-20. Ramma er frå omkring 1670. På altaret er Jesus flankert av Maria og Josef, og på dørene er det maleri av Maternus og en 1500-talsversjon av Heilag-Olav.
Med omramminga er altarskapet ein kompleks og stor gjenstand; ca. 340 cm brei og ca. 270 cm høg.
Riksantikvaren meiner den gamle altartavla er eit godt døme på at gamalt kyrkjeinteriør har gått gjennom mange endringar i fargar, og dermed fell det godt inn i NIKU sitt forskingsprosjekt Fra middelalder til renessanse, katolisisme til lutheranisme – hva skjedde med kirkekunsten som overlevde endringen.
Altarskapet vart frakta frå Norddal kyrkje til NIKU sitt atelier tidlegare i år. NIKU skal utføre eit sokalla forprosjekt, der ein kartlegg endringshistorikk gjennom m.a. undersøkingar av fargelag samt undersøkjer behandlingsmetodar for altarskåp og den barokke ramma.
Rådgjeving, kontroll og godkjenning av metode for konservering er Riksantikvaren sitt ansvar, og når forprosjektet er fullført kan det bli tale om eit hovudprosjekt, der sjølve restaureringsarbeida skal utførast.