Dagke datne vuajneme guktie adtjegh reakadamme maana dutnjien vuartesje?
Tjelmieh stoere jïh mïrhke. Vuartasjeminie.
Mij akt tjeakoes lea. Jieleme aejlies. Gosse onne maanam steerebe, dellie galkebe rontestalledh, jïh garresommes mïele sån myöjhkebe sjædta. Heajhkalibie jïh ussjedibie, hïegke stoere vadtesinie lea.
Maam ryöjnesjæjjah ussjedin gosse eengkelh jihtiejin jïh saarnoejin maana reakadamme Bet-Lehemmese? Stoere åavtoem vööjnin jïh govlin. Maam edtjin jaehkedh?
Skodtin Bet-lehemmese. Ojhte, onne maanam jïh eejhtegidie gaavnin.
Saatnan lij maam eengkelh soptsestamme. Maanam desnie gaavnin suejniej nelnie mejtie kreekh edtjin bårredh. Veaksehks gïeth mah sïrvh steereme, suejnieh jïh tjaetsie-lihtieh guadteme jïh dållem bïejeme, onne maanam steereminie. Eengkelh maanan bïjre soptsestamme jïh lååvleme.
Giefies ryöjnesjæjjah sjïdtin dah voestes almetjh gïeh Messiam, Lutniestæjjam gaavnesjin, jïh saarnoejin sijjieh Josefem jïh Maarjam jïh onne maanam vuajneme. Dah voestes jaahkoeladtjine sjïdtin, jïh dah gijhtiejin juktie dah maanam vuajneme jïh åavtoem heevehtamme. Daelie aaj almetjh saerniestieh ryöjnesjæjjah onne voenen luvhtie lin man nomme Beit Sahour mij Bet-Lehemmen lihke lea. Daaletje almetjh ryöjnesjæjjide mujhtieh jïh dejtie heevehtieh.
Jåvlevaentjele soptseste onne maanan bïjre. Mij akt jåvlevaentjelen jïh mijjen gaskoeh lea. Saernien jïh mijjen gaskoeh leah gieriesvoete, jaahkoe jïh håhkoe.
Jupmelen gieriesvoetem vuejnebe jïh aajhtsebe gosse saerniem Jeesusen jielemen bïjre govlebe. Stoere-aajmoem, Elmien Jupmelem vuejnebe gosse onne maanam Maarjan faerhmesne vuejnebe.
Jupmele goh slïedte-maana.
Mijjen gaavhtan, jïh gieriesvoeten gaavhtan.
Jaahkoe maahta mijjese mysteriumem vuesiehtidh gosse vuartasjibie. Jaahkoe mïelem rïhpeste, jïh dellie vuejnebe dam mij stööremes, aejlies jïh ihkuve lea.
Håhkoe daesnie lea: Jupmele ij leah jïjtse sjugniedimmiem laahpeme.
Bïllijibie, asvedibie, gosse vuejnebe veartene gåarhmoeh raadtan vualka. Jåvlen saernie baernien bïjre håhkoem vadta.
Raeffine båata.
Onne maana byjjeni jïh Jeesusinie sjïdti gie mijjese åehpie lea vaentjeli gielhtie. Buerielaakan dåemiedi, hïegkh jealajehti jïh minngemosth gieriesvoetine jaemeden tjïrrh vöölki mijjese orre jieledem vedtedh.
Ij gåessie gænnah mijjem laahpeme. Daesnie mijjine aktine lea, jïh jïjtse raeffiem mijjese vadta, mijjese gïej leah nåake biejjieh guktie geerve jielebe jïh geerve guarkebe. Mijjen luvnie lea gosse asvedibie. Mijjen luvnie jïh mijjen jieliemisnie.
Gieriesvoete mij gaajhkem gaarsjele, jåvli vaentjelisnie lea. Jïh raeffie gosse geerve biejjieh båetieh. Håhkoe gosse jemhkelde sjædta. Aarmoe mij mijjem giengeles vaevliej bijjelen guadta.
Jupmele mijjine aktine lea.
Buerie-sjugneds jåvlh!
Jåvlevaentjelem maahtah Lukasen vaentjielisnie lohkedh, mubpede kapitelistie. Lohkh aaj Meehten vaentjielistie, voestes jïh mubpede kapitelijstie, jïh Jåhhan vaentjielistie, voestes kapitelistie, voestes vïersen raejeste luhkie-gaaktseden vïersen raajan.
Herborg Finseth
Nidarosen bïspe