I Den norske kyrkja sin digitale varslingsportal (kyrkja.no/varsel) kan både tilsette, frivillige og publikum varsle om kritikkverdige forhold.
I 2023 vart det meldt inn 144 saker digitalt. Av desse er 74 ferdigbehandla, og av desse igjen er 25 avvist som «ikkje-kritikkverdige forhold». I 2022 var talet på digitale varsel 129.
– Vi må vere varsam i bruk av statistikken. Det kjem også varsel via andre kanalar og vi er framleis i ei fase med implementering og opplæring av sakshandsamarar. På sikt er målet å ha ei mest mogeleg komplett oversikt på nasjonalt nivå.
Det seier HR-direktør i Kyrkjerådet, Erik Faye Lindvig.
Det er stor breidde i innhaldet i varsla. Dei omfattar alt frå mobbing og diskriminering, til ulovleg aktivitet og brot på teieplikt. Ikkje alt er kvalifisert til å vere eit varsel. Arbeidsmiljølova gjev krav til korleis ein skal handtere varsel.
Stadig fleire brukar digitalt system
HR-direktøren seier at fleire og fleire fellesråd tek systemet i bruk.
– Det gjer at stadig fleire av kyrkja sine tilsette jobbar på ein arbeidsplass der dei kan varsle digitalt. Varslingsinstituttet er viktig i norsk arbeidsliv, og vi jobbar med å gjere systemet kjent for tilsette.
Så langt har Kyrkjerådet, alle bispedøma og 48 prosent av alle fellesråda teke løysinga i bruk.
God kjennskap til varslingsrutinar
Hausten 2023 vart det gjennomført medarbeiderundersøking i Den norske kyrkja. Her svarar 76 prosent at dei er kjent med rutinane for varsling av kritikkverdige forhold.
– Det er bra at mange kjenner rutinane for varsling, og dette er noko vi framleis må jobbe med, seier Faye Lindvig.
I same undersøking svarar dei tilsette at dei stor grad har tillit til at dei kan varsle utan at det får negative konsekvensar, og at varsel blir teke på alvor.