Hans Majestet Kongen har utnemnd kyrkjerådsleiar Kristin Gunleiksrud Raaum til Riddar av 1. klasse i St. Olavs Orden for hennar samfunsnyttige innsats.
Kansellisjef ved Slottet, Mette Tverli overrakte ordensmerket til Raaum på eit arrangement på Kirkens hus i Oslo.
– Du har vore ei tydeleg stemme for likeverd og mot diskriminnering i kyrkja. Ein tydeleg bodskap om at ingen skal bli utestengd. I kyrkja skal alle vere velkomne.
Det sa kansellisjefen ved overrekkinga og heldt fram: – Du vert skildra som ein kunnskapsrik og engasjert kyrkjepolitikar. Du har leia kyrkja gjennom ei tid med store omstillingsprosessar.
Tverli understreka også Raaum si evne til å vere samlande som øvste folkevalde leiar i Den norske kyrkja:
– Ei overskrift for dit virke er brubyggjar. Det vert sagt at du har ei eiga evne til dialog, og til å byggje god kultur for usemje. Lyttande og oppteken av å finne samlande løysingar.
Takksam
– Å vere med på dette har vore ei forplikting og eit privilegium, sa ein tydeleg rørt Raaum etter å ha fått ordensmerket.
– Fordi det også handlar om mitt liv og min plass i kyrkja. Det har vore djupt meiningsfullt å arbeide med dette.
Raaum uttrykte takksemd til familie, vener, samarbeidspartnarar og dei som hadde sendt inn og støtta søknaden.
– Mest av alt vil eg rekke ein takk til Hans Majestet Kongen, og eg bed kansellisjefen overrekke mi djupe takksemd til Kongen. Dette betyr meir enn eg fattar.
I arrangementet på Kirkens hus heldt preses Olav Fykse Tveit ei helsing som ein av forslagsstillarane, samt Arne Backer Grønningsæter på vegne av Open folkekyrkja som hadde støtta søknaden. Statsforvaltaren i Oslo, Valgerd Svarstad Haugland, har også handsama og støtta søknaden. Kyrkjeleg kulturverkstad stilte med Solfird Molland som sang til forsamlinga.
– Takk for orda og for dette arrangementet. Eg tek vare på det i mitt hjarte, sa Raaum.
